مليش اي نفس اكتب مقدمات علشان زهقت …
* ليه بقى واشمعنا التحرش ده موجود في مصر بس ومش موجود في اي بلد عربيه تانيه … وماحدش يقولي ماهو موجود في بلاد تانية كتير غيرنا انتي الي مش بتشوفي .. لا والله بشوف بس عمري ماشوفت زي الي بشوفه هنا بالمنظر ده وبالوقاحة دي وبالشكل ده .. ، وحياة اغلى حاجه عندكوا محدش يقولي المعيشة ويخترع ومبررات ملهاش لازمة
هتقولوا العيب في البنت وفي لبسها طب البنت منتقبة وزي ما في بعض الناس بتوصف ” خيمة ماشيه عالأرض ” يبقى بأي سبب الحقير يتحرش بيها .. يبقى زي ما انا قلت
والله لو اديت لواحد أقصى مرتب ممكن يحلم بيه واديتله كل أسباب الغنى وهو أخلاقه وحشه وزباله ومش متحضر برضه هيفضل كده مش بالمادة ولا بالمكانة اطلاقا
وبعدين في مصر بس برضه اكسكلوسف في التحرش من نوع أخر التحرش بالمشاعر
واحد يفضل يمثل على واحدة انه بيحبها وبيموت فيها وفي الاخر يسيبها ويروح يتجوز صالونات وممكن اوي تطلع البنت اللي اتجوزها مشيت مع كل سكان البلد وضواحيها وعلى المقيمين خارجها مراعاة فروق التوقيت بس هو غباء مستحكم
واحد يفضل يكلم واحدة عالنت ويقولها يا حياتي وذكرياتي وامنياتي ف الحياة والخ الخ الخ وفي الأخر تكتشف انه متجوز وعنده اربع عيال أوعنده 60 سنة وبيمثل انه شاب
* عمالة بسأل نفسي مين ال……. اللي اخترع المدارس والكليات
الأطفال في مصر دونا عن كل اطفال العالم عمرهم بيتسرق بيرجعوا من المدرسة مدروخين والدروس بتقضي عليهم وبعدها يناموا
وهكذا زي الحيوانات اللي مربوطة في ساقية ولا بيستمتعوا بطفولتهم ولا بيمارسوا أي نوع من أنواع الأنشطة ولا حتى بيتعلموا لأنهم بيحفظوا وخلاص وفي نهاية التيرم بيرموا كل اللي حفظوه في ورقة الاجابة وخلاص وكل عام وانتم بخير
* كل عرض من العروض التجارية أو البنكية أو حتى التعليمية أو الصحية او الاعلامية لازم ميكونش فيها صدق ، مفيش حاجة ممكن تثق فيها في مصر لأن أكيد هتتسرق ويتنصب عليك للأسف
* واقفة كتير مش عارفة أعدي الشارع امبارح والعربيات هاين عليها تدوس على الناس اللي ماشية
وكل ما بتزيد تناحة السواقين بتزيد تناحة المشاة وبينتج عن كده الوضع المزري اللي في الشوارع دلوقتي
يا محمد منير دي مش بلد البنات زي ما انت بتقول دي بلد الدراع ، كل واحد بياخد حقه بدراعه والانسان المتحضر اللي عنده عقل ملوش مكان فيها
وعلى رأي أبو الليف الندالة دي حالة عامة
على الهامش :
كل أحزاني خطيئة ..كل أشواقي التي لا تختبيء..كل أفراحي التي تظهر كالزمردة العتيقة
كل شئ لا يحتمل معنى الوضوح ..يحتمل معنى الخطيئة
كل الزوايا المستديرة ..و الشموع التي ترسل للسماء ضوء ..و الأساطير الحقيقة
كل شئ لا يحتمل معنى الطبيعة .. يحتمل معنى الخطيئة
كل دمعات النساء .. وكل ضعف النساء .. وكل شئ في النساء .. قالوا عنه هو الخطيئة
وكل شئ لم تباركه النساء ..لم يحتوي حب النساء ..لم يحتمل طهر النساء ..
كلها يا صحبي حقيقة تعني الخطيئة
اترك تعليقاً