كنا في أواخر الشتا قبل الي فات ولا الي فات مش هتفرق كتير بس الأغنية دي من امبارح وهي بتلعب في ودني وصاحية النهاردة ولسه بنقول ياهادي فتحت الجهاز و دخلت على نجومي و حملتها وقاعده بسمع فيها من الصبح ولا كإن عندي امتحان كمان يومين خالص يافاشل يا فاشل يا فاشل
نرجع لمرجوعنا ………… الاغتصاب
الاغتصاب يعني ان حد ياخد حاجة من حد غصب عنه بس للأسف في مجتمعنا ارتبط الاغتصاب بمعنى الاغتصاب الجسدي بس زي ما معاني كتير اتغيرت وارتبطت بمعنى واحد بس زي مثلا
لما نقول الحب يبقى حب بين واحد وواحدة مش الحب بمعناه الشامل زي الحب الالهي وحب الخير وحب الوطن ….الخ
المهم كلنا عرفنا قرار وزير التعليم العالي اللي المفروض انه يمنع النقاب جوه اللجان ولازم اللي لابسة النقاب تكشف وشها طول وقت الامتحان جوه لجان الامتحانات اكيد لما وزير التعليم العالي يصدر قرار هيتطبق هيتطبق هو الراجل يعني قعد و تعب وهو بيفكر واصدر القرار علشان يعني مايتعملش بيه حاشا وكلا
وانا بلف بقى كده في النت لقيت بنت كاتبة عن الي حصل في لجان الامتحانات عندهم في أول امتحان ليهم هي في كلية اقليمية ( جامعة المنصور تقريبا ) كليه الاداب زينا برضو بسبب موضوع النقاب ده البنت بقى مستغربة ان الموضوع دا يحصل في كلية منفية زي كليتهم كانت متوقعة ان الكلام ده يحصل في جامعتنا او جامعة القاهرة مثلا
بتقول ان لجنة الامتحان كانت كلها دوشة واعتراض اول نص ساعة من الامتحان وفي بنات لابسين النقاب جوه اللجان خرجوا
عجبني بقى موقف كانت بتحكي عليه للمراقبة اللي على لجنتها انها قالت للبنت حاولي متظهريش انك لابسة نقاب (وكأنها لابسة بكيني مش نقاب) علشان محدش يخليها تشيله
لكن دكتور من الكلية من عندهم جيه وزعق للبنات اللي مش شايلين النقاب وقال لهم(كل واحدة تكشف وشها ، انتي يا بت شيلي النقاب ده ) الهي يشيلوك انتا ويتزحلقوا وتقع وتتفشفش في يوم كله مطر ومش باين اوله من اخره
ده غير ان كمان كانت بتقول ان المراقب اللي في اللجنة اللي قدامها كان عمال يزعق عالنقاب برضه
يعني بكل بجاحة كده ممكن مراقب عيني عينك يقول لبنت شيلي حجابك او شيلي الجاكت اللي انتي لابساه ده ؟ محدش يقوللي في فرق لأ مفيش فرق المبدأ هو نفس المبدأ
الموضوع ده ضايقني اوي انا مش لابسة النقاب بس احساس بشع ان واحدة تفرط في حاجة هي مقتنعة بيها
يعني ماشي هو مش فرض وفي اختلاف اراء عليه والبنات لابسينه فضل عايزين ياخدوا ثواب أكبر هما مقتنعين انهم كده صح او انهم حلوين اوي فممكن يعملوا فتنة بجمالهم هما احرار في وجهة نظرهم وفي لبسهم طالما مش بيأذوا حد
لو حصلت مشاكل كتير بسبب النقاب خلاص خلوا موظفة من الكلية تمر على المنتقبات وتشوف هما اللي في البطاقة فعلا ولا لأ او حتى عالبوابة لكن كده بجد الوضع مقرف
يعني بدأنا مع شيخ الازهر واجباره بنت على خلع النقاب ووصلنا لقرار منع لبس النقاب في اللجان مش عارفة ايه حال النقاب بعد كده بس الي اعرفه ان القرار فعلا صعب
و مش فاهمه ايه اللي كاتبينه على اللجان بتاعة كليتهم من بره ” تحقيقا لمبدأ تكافؤ الفرص النقاب اتمنع جوه لجان الامتحانات “ مين تكافؤ الفرص دي هو احنا بنقدم على شغل ولا ايه !
لا دا غير كمان ان في تفتيش لشنطهم وهما طالعين لجنة الامتحانات والمصيبة بقى ان الي بيفتش الشنط كان راجل مش واحدة
انا مش فاهمه حاجة و بجد دمي اتحرق لما قريت الي حصل مع البنت دي في كليتهم ومش عارفة ايه الي هيحصل معانا احنا كمان لسه
يارب اخد الليسانس قبل ما يمنعوا الحجاب جوه لجان الامتحانات ما هما بيقولوا انه طريقة للغش 😀
اترك تعليقاً