أصدق 10 حاجات في حياتي
مش عارفة ليه بكتبهم وايه المستفاد منهم بس حبيت احتفظ بيهم على جدار ذاكرتي
اولا : أصدق حقيقة في حياتي كلها ربنا سبحانه وتعالى اللي خلقني وخلق كل شيء الرحمن والرحيم واللطيف والخبير ومن له الأسماء الحسنى
ثانيا : اني مسلمة وعلشان كده لازم التزم بحاجات كتير احيانا بتكون ضد هوى نفسي وبحاول بقدر الإمكان ابقى ظاهري زي باطني يعني شكلا وافعالا واخلاقا فأنا بحاول بقدر الامكان اكون مسلمة بجد واستاهل الاسم ده واكيد مقصرة مهما عملت بس بحاول وبدعي ربنا انه يهديني ويثبتني ويقوي ايماني علشان ابقى مسلمة حقه
ثالثا : بابايا حبيبي اعظم واحن واجمل اب في الحياة ، لما بيكون راضي عني ببقى في قمة السعادة ولما بيتعصب عليا ببقى في قمة الكآبه
وبدأت اهدي شوية من عصبيتي واحط اعصابي في فريزر لما فهمت معنى ان عصبية بابا مش ممكن تتقارن بحنيته علشان كده يتعصب براحته 🙂 ربنا يباركلي في عمره ويحفظه من كل شر
رابعا: مامتي حبيبتي وانتيمتي واختي مهما اتكلمت عنها مش حوفيها حقها و زي دايما ما بقول ميتحكيش عليها
ماما بالنسبة لي كل حاجه واكتر انسانة اخدت طاقة سلبيه مني واكتر انسانة ضحت علشاني واكتر انسانة قوتني في لحظات انكساري وضعفي وحزني وصبرت عليا واكتر انسانة حبها مش مشروط والحمد لله انها مامتي لان لو ام غيرها كانت رمتني من البلكونة او من فوق هرم خوفو الأكبر بس الحمد لله مامتي مش شوريرة مع اني بعلي لها الضغط كتييييييير ربنا يستر بقى ويباركلي في عمرها ويحفظها
ربنا يرجعلي بابا وماما بالسلامة والله الحياة من غيرهم ولا تسوى مهما كان مين حوالينا الحمد لله ان ربنا رزقني بيهم ويارب اعني على برهما
خامسا : اخواتي ربنا يخليهوملي ضهر وسند وعزوة مهما حصل بينا عمري في حياتي ما اتمنى يكون ليا غيرهم علشان بجد نعمة عظيمة اني احس اني ليا مين يحميني ويخاف عليا ويشيلني في عنيه ومهما حصل عارفة انهم قلبهم عليا
سادسا: نصي التاني الي بيكملني والي باقي الحياة هيكون ليه ومعاه يمكن مايكونش موجود بس عارفة انه مكتوبلي ومقسوملي وهيكون ان شاء الله الانسان الي يحافظ عليا الي ياخد بايدي علشان نكمل الطريق سوا الي هبقى معاه في كل خطوة وكل فرح وكل ديقة و الي يارب ان شاء الله يقربني من ربنا وياخد بايدي لطريق الهداية والخير انسان بيخاف ربنا وعارف ربنا علشان هو الانسان الوحيد الي ممكن اطمن على نفسي معاه .. واثقة اني مش عايشة في وهم وواثقة ان ربنا ان شاء الله عمره ما هيخيب رجائي واملي اللهم ارزقني الزوج الصالح يارب
سابعا: كرامتي أغلى من حياتي ولو هموت مش بسمح ولا هسمح لحد يقرب منها وخسرت حاجات كتير في حياتي بسببها زي درجات عالية في وصديقات راحوا في الوبا بس كل الحاجات اللي خسرتها مكسب قدام خسارتي لكرامتي لأن كل حاجه ممكن تتعوض الا الكرامة
ثامنا: أحلامي الحمد لله احلامي صادقة جدا ومن صدقها في كتير اتحقق منها وعقبال الباقي ان شاء الله
تاسعا : الحياة والموت بيظهر فيهم الصدق ده غير انهم اصدق حاجه بتحصل للإنسان في حياته وانا مقتنعة بالموضوع ده جدا الحمد لله وعمري ما فقدت توازني بالعكس دايما صبورة الحمد لله وبصبر الي حواليا بس يارب افضل كده علشان تقريبا كده البنات كل ما بيكبروا بيتهطلوا
ربنا يرحم كل موتانا وموتى المسلمين ويرزقنا حسن الخاتمة
عاشرا : مشاعري أصدق حاجه في حياتي ومستحيل أأقدر اخبيها بتظهر عليا في نظراتي وملامحي ونبرة صوتي
لما بحب ، بحب بكل ذرة في كياني ولما بكره برضه بكره بكل ذرة في كياني وكتير قالولي انتي لما بتكرهي بتبقي صعبة أوي رغم اني عمري ما كرهت حد قبل كده !
و بفكر مليون مرة قبل ما أكره حد لاني لو كرهت مستحيل احب تاني ابدا
ربنا يستر ومكرهش حد بحبه ولا حد يكرهني
اخيرا : الحاجات الصغنونة اللي بتحصل في حياتي وبتفرحني ولأنها بتبقى مش مقصودة ومش متوقعة فبتبقى صادقة جدا وبفرح بيها جدا
زي مثلا لو حضرت محاضرة حلوة ولو خلصت قراءة كتاب ممتع ولما بنقعد نضحك ونغني انا وزميلاتي في الكليه حجات كتير اوي وكلمات كتير جدا رغم انها صغيرة وبسيطة الا انها هي فاكهة الحياة في عز الديقة ممكن تلاقيها رسمت اجمل بسمة وبتكون صادقة اوي اوي اوي الحجات الصغيرة دي هي السكر الي بيتحط على القهوة يحلي مرارتها وسكر زياده علشان انا بحبها كده
كارول سماحة و ( ياما ليالي ) مش عارفة ليه دايما لما بسمعها بحس اني متخلفة وعايشة الحالة معاها اوي
بحس اوقات ان البنات عقلهم صغير اوي من كتر ما بشوف هبل بيحصل بس بردو عجباني السونجاية دي رغم الهبل والهطل وماحدش ليه دعوة انا حرة
على الهامش :
إستقَل نيوتن بـ تفكيره
حين سجّل في بداية دفتره :
( أفلاطون صديقي .. وأرسطو صديقي ،
ولكن أفضل أصدقائي هو الحقيقة ) !
أمّا أنَا فـ سأنفرِد بِكَ وأكتب هُنا :
” أنت حبيبي ، وأنا لكَ ..
ولكننّي أحبّك أكثَر أكثَر أكثَر ! “
اترك تعليقاً