أول يوم حريه : لسه مش حاسه إني اتخرجت وإني خلاص مش طالبه
بس حقيقي فرحانه أوي
وإيه الي هيزعلني يعني إني مش هشوف صحابي كل يوم وإني مش هشوف الناس الي بحبها على طول ؟؟!
إيه الي هيزعلني يعني إني مش هلاقي حاجة اعملها وإني مش هنزل في الحر والزحمه و شحططة المواصلات ؟؟!
إيه الي هيزعلني يعني إني بقيت خلاص أخيرا حره من المذاكرة ومن الكتب ومن التكليفات الي تهد الحيل ؟؟!
أبدا .. كل ده عااااااااااادي خالص طبيعي خاااااااااااااااالص مهي دي سنة الحياة ومفيش حاجة بتبقى على حالها نهاية مرحلة وبداية مرحلة جديدة …
أول امبارح كنت طفله كانت ماما بتسرحلي شعري تلبسني الشوز بتاعي تأكلني تنيمني في حضنها …
النهارده أنا في عز شبابي بلف طرحتي و بعمل أكلي وبنام في أوضتي لوحدي …
أول امبارح ده كان من سنين طويله مش فاكره عددها أو مش عايزه افتكر علشان ما احسش اني خلاص كبرت .. كبرت على عدم تحمل المسئوليه وعلى جنان الطفوله وتسرع المراهقه …
اكتر كلمه مخيفه ” كبرت ” مع الاعتذار للخوف طبعا علشان الكلمه دي تقيله اوي عليه زي ماهي علينا .. هو دا العمر مراحل وكل مرحلة مجرد نقطه في أول كل صفحة من الكتاب …
كل الي فاضل من الي فات ألبوم صور وشوية ذكريات شخصيا مليش في صور الكآبه وذكريات الدموع كلها بتمر عليا مرور الكرام الحمد لله …
وداعا أو مع السلامة لمرحله غيرت فيا كتير ويارتني خرجت منها زي مادخلت كنت أتمنى …
وداعا أو في داهية لكل الوشوش الخداعه والمظاهر الكذابة وكل النفاق والكدب والانانية والمصالح ولابد يوما أن تسقط الأقنعه …
وداعا أو على أمل اللقاء فقط مني لمن أحب مش هنشوف بعض زي زمان وكل واحد هتاخده دنيته يا ترى دا هينسينا احنا مين ولا المشاعر الصادقه عمرها مابتتنسي ؟! أظن الايام كفيله بالاجابه على السؤال دا …
شكرا لأيام علمتني كتير .. شكرا لناس علمتني كتير .. شكرا على الحلو الي اتعلمته والوحش الي عرفته علشان في كل الحالات كسبت أنا ما خسرتش حاجة …
شكرا لناس قربت مني وعرفتني وحبتني ( أنا اتحب من غير حاجة طبعا )
شكرا لناس سمحولي اقرب منهم واعرفهم واحترمهم واقدرهم يعني احبهم ( اوعوا حد يتغر )
ربنا يوفق الجميع بقى حلو و لا وحش كل واحد على نفسه وقادر ربنا على كل شيء …
البروم الاسبوع الجاي ان شاء الله بغض النظر عن انه قبل النتيجه بس احسن اصلها مش ناقصة نكد …
ايه الخطوة الي جاية الله أعلم بس الي متأكده منه إني مش هعرف الناس دي تاني أنا ماصدقت خلصت خليني بقى اخد فترة نقاهة طووووووويله أوي علشان أتعافى …
الناس الي بتزعل مني علشان بدخل ومش بكلم حد وعامله اوف لاين للناس كلها بلا استثناء معلش بقى وبعدين كفاية عليكم باقي الناس هبقى انا وهما يعني دا حتى يبقى حرام …
الناس الي واثقة اني مش هكلمها تاني ومش هعرفها خلوا ظنكم كويس وربنا يكرم كده وابقى اسأل عليكم كمان عشرين سنه …
الناس الي مش عايزة تعرفني بقى بليز ولا انا عايزة اعرفكم علشان كده نتفق نمسح بعض من اي مكان من الفيس ومن الميل ومن الموبايل ومن الدماااااااااااغ …
كده انا طولت أوي ومش باقي بس غير اني أقول حاجة واحده وبردو فقط لمن أحب
I’LL MISS U
على الهامش :
تظل الحياة رائعة بروعة أولئكـ الذين يثقون بنا فيدفعوننا للأمل والعطاء والوفاء والتسامح وحب الخير وزرع الثقة في قلوب الآخرين .. ويجبروننا بصدقهم وعفويتهم على أن نعيد النظر في حياتنا وعلى أن
نغير مفاهيم خاطئة أو مبالغ فيها عن الحياة .. وهبونا روعة الحياة
The Magic of Life
اترك تعليقاً