حتى أنا مابقتش أنا

مممم

بدايه غريبه مش كده .. آه والله كده .. ايه الدخله الي ملهاش دخله دي .. ماااااا علينا

سنه تانيه من حياتي خلصت سبحان الله والله عدت هوا من غير ما احس بيها العمر فعلا بيجري

كنت بقول على السنه الي قبل الي فاتت دي على طول الي هي كنت فيها في 3 انها أغرب سنه واسوأ سنه

لكن بالنظر بقى للسنه الي فاتت دي الي هي 4 الحق يقال انها سنه ماعدتش عليا قبل كده

من غير كدب عملت فيها حجات كتيييييييييير مش هقول ندمانه عليها علشان اتعلمت منها كتير كمان .. الحمد لله

مش عارفه ايه نوبة الضحك الي بتنزل عليا لما بفتكر الأحداث الغريبه الي حصلت كلها

ناس شوفتها ويارتني ماعرفتها وناس عرفتها متأخر وناس خسرتها وناس كرهتني في عيشتي .. بعد الشر عليا طبعا

مش عارفه ليه بس حاسه ان انا مابقتش أنا نفسي شخص واحد يقولي لا انتي هو انتي .. مافييييييش

و افتكرت ايه خير اللهم اجعله خير الأغنيه الشعبيه الشهيره الي بتقول [ ببص لروحي فجأه .. لقتني كبرت فجأه .. تعبت من المفاجأه .. ونزلت دمعتي .. قوليلي ايه يا مرايتي قوليلي ايه حكايتي تكونش دي نهايتي وآخر قصتي  أنا مش عارفني
أنا تهت مني
أنا مش أنا
لا دي ملامحي
ولا شكلي شكلي

ولا ده أنا … ولا ده أنا ………………………….]

طب اعمل ايه يعني دلوقتي اروح ادور اروح ادور اروح ادور على نفسي 🙂

طيب ماهي برضو السنه ماكانتش وحشه اوي كده بالعكس الحمد لله برضو كان فيها حجات كتير حلوه

عرفت مين بيحبني ومين مش بيحبني ومين هبقى عليه ومين هديله السكه و كبرت كمان ودا شيء حلو يعني

أصل الواحد يكبر بقى ويعقل ويهدى وينزل عليه السكون كده … حاسه اني مش بتكلم على نفسي خالص

طيب بعيدا بقى عن ان السنتين دول كانوا عثل عثل عثل بكل المواقف الي فيهم

لسه هنعيده تاني وربنا بقى يكرم وتكون آخر اعاده علشان الشريط سف خلااااااااص

نرجع لرمضان و لمكه الي مابقتش مكه  .. لا والله جد مابقتش مكه ممكن نقول بقت دبي لكن مكه نو واي .. انجليزي ده يامرسي

الأبراج الي طلعت وبقت فووووووووووق و الحرم بقى تححححححححححت غيرت كل معالم مكه .. الهدد الي حاصل دلوقتي والناس الي المفروض تسيب بيوتها وتدور على سكن وغالبا كده خارج مكه لان كل مكه حتتهد علشان تتبني أبراج أبراج أبراج أبراج وقال ايه علشان تبقى العاصمه الإسلاميه

كووووووووووول ده علشان تبقى  طب ماهي العاصمه الإسلاميه للعالم كله بوجود الحرم فيها وده كافي أوي ايه لزومه كل الي بيحصل ده وهنوصل لفين من كل ده بس هنقول ايه ماهي دي علامات الساعة [ الحفاة العراة رعاة الشاه يتطاولون في البنيان ] … يا منجي من المهالك يااااااااااااااارب

رمضان بقى عندي احساس انه الحمد لله حلو جدااااااااااااااا حلو في كل حاجه في قعدتي مع بابا وماما على الفطار في صلاة الجماعه في المغرب والعشاء والتراويح والفجر في كلام بابا ونصايحه في وجودي في مكه في معرفتي اني لسه قدامي كام شهر مع بابا وماما وفي وسطهم لحد موعد امتحان مادة التيرم الأول الي ربنا يعديه على خير … رمضان الخير ان شاء الله يارب

طبعا الانسانه الوحيده الي أنا متأكده ان قعدتي هتجننها هي ماما نفسها تطيرني النهارده قبل بكره يعني أنا ماصدقت ان ربنا اداني السنه دي مهله تانيه من عنده ولسه قدامي سنه على ما أخلص الجامعه وهي ولا هي هنا وكل يوم تتفرج على مسلسل عايزه أتجوز ومحسساني اني قاعده على قلبها كده زي هند صبري مش عارفه انا هي عايزه تخلص مني ليه يعني دا انا حتى مونساها طب بلاش هي على الأقل اخواتي بيلاقوا حد يطبخلهم وكفايه بقى الحلويات الي بعملها كل العيله بتحكي على أكلي … ربنا مايجعلنا جار وله عنين

بمناسبة هند صبري وأنا عايزه اتجوز هي ردود فعلها مبالغ فيها الصراحه بس التيم ككل كويس مش بطال بمناسبة بقى عايزه اتجوز فأنا مش عارفه ايه المشكله العظيمه دي صحيح سوق الجواز شاحح بس في عرسان وهي بيجيلها عرسان مش عارفه بقى هما ليه مطلعين كل العرسان مبالغ في تصرفاتهم أوي كده أنا عمري ما اتحطيت في الموقف البايخ ده الحمد لله علشان مجرد ما اسمع بس ان في حد بيفكر بيبقى مصيره التطفيش بس معقوله فعلا الوضع بيبقى كده ولا دي ناس مبالغ فيها ولا ايه بالظبط … يامنجي الجحش من الوحش يارب

بمنسابة ذكر المسلسلات بقى فأنا مش عارفه ايه الاكتساح الرهييييييييب دا ايه كمية المسلسلات دي هما ايه قصدهم بالظبط وليه المسلسلات بتكتر سنه عن التانيه يعني الناس تصوم وتصلي وتقرا قرآن وتعبد ربنا ولا تتفرج على التليفزيون وتحيا جمهورية مصر العربيه .. لا بجد ايه كل ده [ شيخ العرب همام ، امرأة في ورطة ، مملكة الجبل ، شاهد اثبات ، العتبه الحمرا ، القطه العميا ، زهره وازواجها ، عايزة اتجوز ، بيت الباشا ، قضية صفيه ، أزمة سكر ، حكايات وبنعيشها ، بالشمع الأحمر ، العار ، الحاره ، ماما في القسم ، بره الدنيا ، ملكه في المنفى ، الجماعه ، كليوباترا ،طوق نجاه ، الكبير أوي ، الفوريجي ، اختفاء سعيد مهران ، موعد مع الوحوش ، أهل كايرو ، قصة حب ، اللص والكتاب ، جوز ماما ، منهى العشق …… الخ ] لحد دلوقتي عديت 30 مسلسل وماخفي كان أعظم .. بجد حسبي الله ونعم الوكيل لاني مش شايفه قصد تاني من الي بيحصل ده غير اشغال الناس عن العباده في شهر رمضان المبارك .. طب والناس بقى هتخضع للتنظيم ده ولا هتفكر ان ده شهر مش بيجي غير مره واحده في السنه وان من رمضان إلى رمضان كفاره لما بينهما وان التقرب إلى الله في الشهر الفضيل ده أفضل من الانشغال بالحاجات التانيه … ربنا لا تزغ قلوبناوثبت أقدامنا

مبقاش في حاجه زي زمان خالص لا المدن هي المدن ولا الناس هما الناس ولا الشهور هي الشهور كل شيء اتغير و مبقاش في حاجه زي ماكانت ولا حتى أنا

بعد كل الرغي ده لسه فيه كلام على جنب كلام

على الهامش :

عش حياتك بـ كل ثقه بأن الله يعلم مالا تعلمه أنت
و يخطط لك بـ أفضل صوره هو يراها لك ..
أغمض عينك عن كل ما يتعسهاا ..
و قم بـ تربية قلبك على تحمل فقدان بعض الأشياء التي تحبها
لأنك لا تعلم لماذا فقدتها , ولكن الله يعلم .~