والله مش عارفه ابدأ البوست ده ازاي خصوصا اصلا ان الموضوع الي ناويه اكتبه موضوع غريب مش قوي يعني بس بردو غريب
من فتره طويله يعني تقريبا من بدايه السنه الي فاتت وماما بتهيأني لاني خلاص كبرت وبقيت انسه والمفروض بقى اني احل عن سماها وتخلص مني وبالتالي تفرح بيا وابقى هم وانزاح من على قلبها …
كل ده ماشي وكويس بس اشمعنى دلوقتي يعني كان بيجي عرسان قبل كده ايه الفرق بقى بين دلوقتي وقبل كده يعني هو انا دلوقتي كبرت وقبل كده كنت طفله ولا مثلا انا دلوقتي عقلت وقبل كده كنت هبله .. الله أعلم …
وكله كوم وبابا كوم تاني علشان لسه مقتنع اني مازلت طفله والصراحه انا كمان لسه مقتنعه باني طفله بس كبيره شويتين تلاته وماله هو الطفوله عيب ؟ بالعكس ياريت كنت طفله والله كان اريح وبعدين اصلا هو فيه احلى من قلب الاطفال قلب بريء …
المهم في كل ده بقى المواقف البايخه الي بقيت اتعرض ليها في الموضوع ده بس حقيقي رغم بواختها الا انها كوميديه جدااااااااااا ..
اخر موقف اتعرضت ليه كان في المستشفى وكنت في غرفه الانتظار عقبال ما يجي دوري في الكشف وماما قاعده جنبي دخلت علينا واحده ست غريبه باين كده من دخلتها انها مش مريحه خالص ايه بقى الي حصل الي حصل كالاتي ..
دخلت وقعدت على كنبه جنب الكنبه الي كنت قاعده عليها وبعدين بصت كده عليا وقامت سايبه مكانها وجت قعدت جنبي ورغم ان الكنبه 3 كراسي الا انها قعدت على الكرسي الي جنبي بالظبط بمعنى تاني يعني لزقت فيا روحت انا بعدت عنها شويه ولزقت في حرف الكنبه وبعدين ابتدأت بقى رغي طبعا كل الحوار باللهجه السعوديه
– هي : انتي هنا من بدري ؟
أنا : اه من 8 و ربع تقريبا
– هي : ياه بدري قوي كده ؟
انا : اه بابتسامه ملويه
– هي : حلوه انتي ايه الحلاوه دي ؟
انا وانا بقول في نفسي ايه الناس الغريبه دي : ماشاء الله ، شكرا ربنا يخليكي
– هي : انتي سعوديه ؟
انا : لا مصريه
– هي : بس بتتكلمي سعودي ايه ماشاء الله عليكي ؟
انا بزهق : اصلي متربيه هنا
– هي : انا تقلت عليكي بالاسئله ؟
انا : اه شويه
– هي : تتجوزي سعوديين ؟
انا مخضوضه : لا لا لااااااااااااااااااااااااااا طبعا
– هي : ليه بس دا انتي حتى شكلك واحده مننا والله ما نسيبيك تروحي من هنا ؟
انا : لا لا لا الله يسلمك انا مش عايزه اتجوز اصلا
– هي : انا بدور على عروسه لاخويا وشكلك انتي العروسه دي ..
انا : لا لا بقولك مش عايزه اتجوز وخاصه سعوديين شكرا
– هي : لا بس ماتقوليش كده خلاص انتي العروسه ..
انا بطفش وخلاص هقوم اديها بالبالرينا : يا ستي قلتلك مش عايزه الله يخليكي انا اصلا راجعه بلدي و هبقى اتجوز هناك ان شاء الله
– هي : طيب عندك موبايل ؟
انا وبجز على سناني : اه بس ماعنديش خط سعودي خلاص
– هي : خساره طب ليه ؟
انا وخلااااااااااااااااااااااص وصلت لمناخيري : يا ستي ماعنديش
وقمت اشوف الدكتور وصلت ولا لسه لقيتها جايه من ورايا بتقولي على ناس كانوا قاعدين بره في الهول دا اخويا مع امي وانا اصلا ولا بصيت عليهم و لا لمحتهم والله وحتى لما هي قالت ما بصيتش روحت مدياها ضهري و دخلت تاني غرفة الانتظار ..
لسه الموضوع ماخلصش لقيتها داخله ورايا وجايبه مامتها في ايدها وبرضو قعدت جنبي تاااااااااااااااااني << عاااااااااااااااااااااااااا
و مش كفايه عليا هي لا مامتها كمان كل شويه تبص عليا و تضحك << يادي النهار الي ملوش اخر دهوبعدين بقى
الغريبه ان كل ده وماما ولا هي هنا ولا كانها معايا ولا كانها امي اصلا ساكته وهس هس و انا قاعده ابصلها علشان تلحقني وهي مش معبراني << مردودالك يا ماما مااااااااااااشي مااااااااشي
وبعدين راحت الست دي ومامتها يكشفوا وانا مسكت في عباية ماما وقعدت اقولها قومي بينا نمشي لقيت ماما قاعده تضحك وطبعا انا حسيت بضحكتها و قعدت اغلي << كده يا ماما بتضحكي بدال ما تساعديني وتنقذيني
لسه مالحقتش لقيت الست ومامتها راجعين تاااااااااااني روحت حاطه راسي بين ايدي بدال ما اعيط مش هنخلص بقى ياربي
بس الحمد لله قبل ما اطق واتجنن واعيط لقيت السستر جايه بتنادي علينا ماصدقت اخدت ديلي في بوقي وجريييييييييييت على الدكتور
اوووووووووووووووف احمدك يارب يا منجي من المهالك يااااااااااارب …
واحنا مروحين قولت لماما كده يا ماما تسيبيني لوحدي كده الست كانت هتاكلني شوفتي الغتاته دي عملتلي استجواب دا انا لو بيحققوا معايا ماكانوش هيعملوا كده << عاااااااااااااااااااااا …
لما روحت البيت وقعدت افكر لقيت ان الموقف يمكن ماكانش اوفر اوي زي ما حسيت انا ساعتها بالعكس كان في شيء من الكوميديا لكن يمكن طريقه الدخله والاسئله كانت غريبه فوترتني و يمكن كمان علشان ماما ما قالتش ولا كلمه وبقيت انا لوحدي في وش المدفع كل شيء جايز …
بس الي استغربت منه فعلا موقف ماما لحد دلوقتي مش عارفه هي ليه التزمت الصمت وليه السكوت كان ردها الوحيد …
الكلام ده كان من اسبوع واحد بس لكن كل ما افتكره الاقيني بضحك وبس
بس عجبتني اوي طريقه الخطوبه عن طريق المستشفيات طب افرض يعني كانت العروسه عندها مرض مستعصي ولا فيها حاجه ولا حاجه يعني …
وبعدين يعني هو انا يوم ما اتخطب من المستشفى ما الاقيش غير واحد سعودي يعني مافيش واحد مصري ابن حلال كده << انا مش بعيب في السعوديين انا ليا صحباتي متجوزين سعوديين وعايشين كويس جدا لكن انا بتكلم في مبدأ الرفض الي متاصل عندي أساسا ..
انا حكيت الموقف ده علشان بس ابين ان اطرف المواقف هي المواقف الي بنخاف ونرتبك منها و اطرف المواقف برضو موقف يحصل في موضوع جد لو بصينا فيه في وقتها اكيد مش هنضحك لكن لو رجعنا بصينا عليه بعدها مش هيبقى في اي ري اكشن غير الضحك …
قال وبيقولوا في عنوسه قااااااااااااااااااال ييجوا يشوفوا ….
على الهامش :
سنـكون أكثر سعادة حين نكون
أكثر براءة و عفوية في التعبير عن مشاعرنا ، لأنفسنا و لمن حولنا
و لمن نعرف ولمن لا نعرف : فـ التعبير عن المشاعر ليس بوحـا بأسرار نووية
سنكون أكثر سعادة حين نتخلى عن كبـريائنا و تعاظمنا
و نتواضع و نستمتع إلي حديث النفس و احتجاجها
على تجاهلنا لضرورتها ومتطلباتـها
اترك تعليقاً