مش عايزه اتجوز ( 1 )

يا دبله الخطوبه عقبالنا كلنا مانبني طوبه طوبه في عش حبنا نتهنى بالخطوبه ونقول من قلبنا يا دبله الخطوبه عقبالنا كلنا…..

لا ثواني أوعوا حد يفهمني غلط مش أنا خاااااااااااااااااالص ايمبوسيبول :] ..

في الحقيقه طبعا مافيش بنت مش بتتمنى اليوم ده يجيي وتسمع زغاريط الفرح وتلبس وتتشيك وتبقى اجمل عروسه وأجمل أميره في خطوبتها وأجمل ملكه في فرحها ، مافيش بنت مش نفسها تلاقي نصها التاني الامير الي هيخطفها على حصانه الأبيض وياخدها للقصر الكبير ويعيشوا في تبات ونبات ويخلفوا صبيان وبنات .. صح مافيش بنت مش بتتمنى لكن !!! …

أنا أعلنت حاله التمرد وقولت مش عايزه اتجوز .. أيوه ماحدش يبوصلي كده ( أنا مش عايزه أتجوز ) كلام واضح وصريح ومفهوم ايه الغريب فيه مش عارفه أو جايز عارفه بس بستعبط علشان مش عايزه أوجع دماغي بـ سين و جيم ونفتح حورات مابتنتهيش وندخل مناقشات آخرتها الصداااااااااااااااع وبس …

ماما بتقول إني أكيد مش طبيعيه وجايز أكون متعقده ، طب إيه السبب ؟! قعدت ماما تشغل عقليه المحلل النفسي وعايزاكم تتخيلوا كده الشكل – نظاره نازله على عضمه المناخير و حاجب مرفوع لفوق يدل على التعمق في التفكير و شفايف ملويه تدل على فشل العمليه – رجعت ماما بالزمن لطفولتي السعيده لما كنت  لا افقه من الحياه شيء قالت اه كانت بتحصل مشاكل بس مشاكل طبيعيه زي أي مشاكل بين زوجين بس عمرها ماتطورت أبداااااااا الحمد لله وعمرها ماكانت اوفر علشان تعقدك ، أنا وبابا مدلعينك آخر دلع ومش حارمينك من حاجه وعلشان أبقى صريحه معاكم – بيحبوني اوووووووووووووووووووووووووووووووووووووووووووي – وأنا كمان بحبهم ، طب يبقى ايه السبب ؟!!! فشلت محاولات ماما كووووووووووووووووووووولها …

بابا لسه شايفني الطفله الصوغنونه الي كان بيشيلها على إيد واحده ويلعبها ويدلعها الصراحه هو معاه حق أنا وانا معاه بحس بكده وأكتر ولسه برضو بيدلعني وبنلعب مع بعض وبياخدني في حضنه ويحكيلي حكايات زي زماااااااان ، بس مش معنى كده إنه يفضل مقعدني جنبه مهو كده أنا هخلل علشان هو تقريبا مش مقتنع إني ممكن أسيبه واتجوز ومافيش حد عاجبه كل العرسان زفففففففففففت :] طب أعمل معاه إيه أنا ؟؟!!!!

إخواتي غالبا مش عارفه وجهة نظرهم ، بس متهيألي مش هيختلفوا كتير عن بابا .. كلهم عليا ولا اييييييييييييييه ؟؟!!

أنا مش هكدب على نفسي زيي زيهم لسه حاسه إني طفله نفسي أجري وألعب واطنطط واعيش حياتي ، صحيح جدعه أوي وبميييييييييييييييييه راجل وجد وقت اللزوم ، بس طفله وهبله وبروح السوبر ماركت أشتري حلويات ومصاصات لحد آخر قرش في جيبي غلى رأي واحده صاحبتي كل لما تنزل معايا تقولي حاسه اني ماشيه مع بنتي رنا – رنا دي لسه ماتمتش الـ 6 سنين – :] ، أنا صحيح كبرت بما يكفي خلاص لإني أفتح بيت واشيل مسئوليه كده كده أنا شيلاها علشان قاعده لوحدي أنا واخواتي بس بردو سعات كتير أوي ببقى مجرد طفله عايزه عصير وشوكولاته وتفرح أوي لما حد يجيبلها مصاصه وصوتها يتقلب ْ180 و لو ماشوفتش شكلها تحسب ان الي بتتكلم طفله حقيقيه ، مع إني بيركبني مييييييييييت عفريت لما حد يقولي انتي في سنه كام ياشاطره ؟ أنا مخلصه الجامعه .. ايييييييييه انتي كبيرك أوي تانيه ثانوي يعني مش أكتر من 16 سنه …… نو كومنت بجد ضغطي بيرتفع بجد أنا حاسه إن أنا كده معقوله اوي بس هقول ايه ربنا يشفي ، …

انا مش عايزه اتجوز وده مش عيب فيا ولا عقده نفسيه زي ما ماما كانت بتقول ولا لاني عايشه طفولتي زي ما بابا شايفني ولا لأن ماحدش بيديني سني .. أنا مش عايزه اتجوز مش لأني عايزه أعيش حره ولا لاني بنادي بالمساواه وعايزه أبقى قائده الثوره النسائيه ، أنا مش عايزه اتجوز مش لإني ضد فكره الجواز .. انا مش عايزه اتجوز لأني لسه مالقيتش نصيبي _ نصيبي _ اختصار كل الكلمات الي ممكن تتقال ، في الكتاب الي فيه حياتي من ولادتي لحد مماتي كل شيء معروف ومصون بس أنا مش عايزه اتجوز لأن لسه ربنا ماقلش كن علشان يكون …

لحد كده دي حكايه العروسه .. آمال فين بقى العرسان ؟؟!!

ماحدش يستعجل لسه بدري على حكايتي ماتنتهي سوري أقصد لسه بدري على ماتنتهي حكاياااااااااااااااتي ؛)

آه على فكره أنا و أنا بعمل شوبينج النهارده دخلت واتفرجت على فساتين الأفراح والخطوبه .. لا وكمان عجبني أوي فستان خطوبه وفستان فرح بجد جنااااااااااااااااان وترييييييييييييي شيك والراجل كان بيحسبني عروسه وبيقولي تعالي اعملهولك واستلميه بعد عشر ايام بس 🙂 .. وأنا ماكسفتش خاطره وقولتله ان شاء الله ..ان شاء الله تكون دي بشره خير ياااااااارب  ..

بس لحد مايجي الوقت ده أنا مش عايزه اتجوز :] …


على الهامش :

When a girl builds walls around her.Is not because she avoid a man.she does it to find someone who will be man enough to breaks those walls!!just 2 be with her! [ iam waiting for my man ] soon ya rab



Posted

in

by

Tags:

Comments

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *