مصر دوله الجائعين

انا لسه ببعت أجمل التحيات لكل الثائرين شباب و أطفال وكهول ونساء ، تحياتي لكل الثائرين على أرض بلادي ، تحياتي لأفواه أخيرا قررت كسر الصمت أخيرا قررت تقول ” لا ” ، بغض النظر عن شكل ال لا وأسبابها ، برافو للمصريين …

أنا ماغيرتش رأيي ولسه بقول ان احنا لازم نغير نفسنا وبعدين نطالب بتغيير الحكومه ، لكن يمكن يكون في أمل ان كلا التغييرين يتم في وقت واحد ، يمكن تكون صرخه الثوره دي هي بدايه التغيير النابع من الشعب ، الايام هي الفيصل في المسأله دي …

الي عايزه اقوله بعد الثوره ايه الي هيجي ؟؟ من 52 سنه قامت ثوره عزلت ملك ووعدت بالخير القادم للمصر ، ايه الي حصل بعد كده ؟!

أنا صحيح ماكنتش اتولدت وصحيح لا بابا ولا ماما وعيوا عليها لكن جدي وجدتي حكولهوم وأنا سمعت منهم مش بس جدي وجدتي أي واحد ماوعيش على الثوره لو سأل جدوده هيقولوه الثوره عملت ايه ، الثوره جابت الخراب لمصر وعدت وأخلفت وعدت بالخير وجابت الشر وعدت بالازدهار وقدمت التخلف والفقر والجوع والتشرد ، القدام كانوا بيحلوا الشاي بالعسل بينما دلوقتي الناس بتشرب الشاي مر علشان مش لاقيه السكر ، القدام كانوا بيطبخوا بالسمنه البلدي بينما دلوقتي في ناس أصلا مابتدقش طعم الأكل ، القدام كان تعليمهم كله انجليزي بحكم وجود البريطانيين في مصر بينما دلوقتي في ناس مش لاقيه تعلم ولادها في مدرسه حكوميه ، الملك عمره ماكان وحش ولا ظالم ولا سارق بلده وعايش هو حياته ولا بايع مواطنينه للأجانب بل بالعكس الملك طلع من مصر وسلمها على طبق من ماس مش ذهب للثوار حقنا لدماء شعب مصر وحتى لا تراق نقطه دم واحده من مواطن واحد ، فالملك كان قادر تماما أنه يدافع عن نفسه وعن منصبه ورفض فداء لمصر ، كل الناس كانت عايشه بخير بالمقارنه بالي الناس عايشه فيه دلوقتي نقدر نقول الناس كانت عايشه في نعمه .. رحم الله فاروق الملك والانسان …

خلينا بقى نتكلم شويه عن الثوار الأبطال الي عزلوا الملك وأقاموا دوله عالميه مصريه ، الثوار الي دخلوا سرقوا البيوت ونهبوا المجوهرات والقصور ورموا الناس في المعتقلات عذبوهم وأهانوهم وبهدلوا أسرهم ، أي حد كان بيقول لا كان مصيره المعتقل الي شعاره [ الداخل فيه مفقود والخارج منه أكيد مولود ] دا لو عرفت تخرج وابقى قابلني ، طب وهنستغرب ليه مهي أصلا فكره الثوره دي جت من شويه ناس مش عاجبها عيشتها نفسهم يبقوا – ولاد ذوات – عايزين يلبسوا حرير ويبقى ليهم خدم وحشم ويبقى ليهم اسم ومركز وسلطه ، طلع واحد منهم قالهم نعمل ايه يارجاله ؟! قالولوا نعمل ايه يا باشا قالهم نعمل ثوره يا رجاله مش علشان يقيموا دوله ولا علشان يعدلوا ولا علشان يحرروا الناس زي ماكانوا بيقولوا ، لا طبعا حاشا لله هم عملوا الثوره علشان يطلعوا لفووووووووق ويعيشوا على قفا الناس وتحت مسمى الثوره …

أنا مش بقول كده و أنا معايا مستندات رسميه لكن هقول كده وكل واحد عنده شويه عقل هيفكر معايا خطوه خطوه ، الثوره قامت أستولت على الأراضي والاقطاعيات والمجوهرات والقصور وكل مقتنيات الطبقه العليا في مصر آدي اول خطوه ، ثاني خطوه بقى أسهل من الأولى قالت كل ده ملك الشعب ، ثالث خطوه سؤال مهم أوي . هو فين كل ده ؟! فين الأراضي و الاقطاعيات والمقتنيات ؟! فين الازدهار العظيم الي حل على مصر ؟؟ فين الشغل الي مرطرط في كل حته ؟ فين التعليم الي وصل لأحسن أحواله ؟ فين البيوت الي مش لاقيه الي يسكنوها ؟!؟؟؟؟؟

الجواب بسيط أوي .. كل ده راح بالظبط ماكان ما اتخططله في جيوب – اغنياء الثوره – الي هم مين ؟ الي هم شويه الضباع الي خططت ونفذت ثوره لصالح كل واحد فيهم فقط مش لصالح حد تاني لا شعب ولا حتى بلد ، والدليل هو الحال الي وصل ليه المواطن دلوقتي والبلد الي وصلت للحضيض ومازالت تكمل طريقها فيه يوم بعد يوم ..

كداب الي يقول ان مافيش ناس بتبات على الرصيف دا لو لقت رصيف يلمها ، كداب الي يقول إن الشباب لاقيين وظايف تلمهم وعارفين يشقوا طريقهم في الحياه ، صدق الي يقولك ان التعليم دلوقتي مرادف للجهل ، وان الطبقه الي كانت اسمها متوسطه أصبحت هي الطبقه الفقيره ، وان في بلادنا ناس بتعيش تحت الصفر تحت خط الفقر …

لا والله برافو اوي للثوره الي جابت الخير وجت ، برافو للثوره الي من ساعة ماقامت اتقسمت البلد لشويه لصوص ناهبين البلد ( الطبقه الغنيه ) والجزء الي فاضل ربنا ساترها عليه ( الطبقه الفقيره ) .

برافو لثوره 52 ثوره أقامت دوله جائعين ، من كتر جوعهم أكلوا البلد وجوعوا أهلها ، طز في البلد وطز في الي فيها المهم هم يشبعوا …

أتمنى من كل قلبي إن القادم مايبقاش زي الراحل وان الثوره تبقى ثوره اصلاح مش دمار وفساد ، أتمنى فعلا تكون الثوره ثوره تغيير مش تبديل ، لا حزب وطنی ولا اخوان ولا حزب وفد و لا برادعی ولا أي احزاب معارضة  ، لكن وطن حر وإراده حره و شعب حر  ، بعيدا عن أي طامع في الحكم وأي طامع في الجاه والمال والمنصب واللقب ، أتمنى إن ربنا يدينا حد بيخاف منه ويطمع في رضاه وبس …

تحياتي مره أخرى لثوره أتمنى أن تنجب ولا تعقم ولثائرين أتمنى أن لا تكمم افواههم تحياتي للوطن …