شدي حيلك يابلد يا ما فات عليكي كتير وياما شوفتي .. إوعك في يوم تضعفي ولا تخضعي يا حبيبتي …
خرج مبارك وأخرج معها الفتنه النائمه – لعن الله من أيقظها – كلامه كان واضح ومباشر وقال الي في قلبه – شرب بيريل واسترجل – هو اتكلم كتير الصراحه بس والحق يقال قال كام كلمه كده وكان ناقص يكتب جنبهم – ان اللبيب من الاشاره يفهم –
* قال ان احنا بين خيارين يا السلم يا الفوضى هو الحقيقه كان في منتهى الصراحه لإنه كان كاتب بين قوسين – يا ولاد التيت مافيش قدامكم غير حلين يا أقعد على قلوبكم يا أولع فيكم – يا أنا يا الفوضى وهو دا بالظبط الي ابتدا في تنفيذه مجرد ما ورانا عرض قفاه الناس هاجت وقالت – مش عايزينك ومش هنرحل ارحل انت – قام بالصلاه عالنبي منزلهم ناس ميه ميه شايلين أسلحه بيضه وماعندهمش أي مانع من استخدامها بأي شكل وفي أي ظرف وعلى أي حد وكمان بيقولوا – عايزين مبارك – طب اصبر لما تشم نفسك مستعجل على ايه علشان تورينا ان بقائك في البلد – غصب واقتدار – تكونش فاكر هتعيش 80 سنه تانيه تطلع فيهم عين ولادنا وأحفادنا ياراجل دا حتى الدنيا غروره وكل شيء فاني ومادايم إلا وجه الله …
* قال انه هيوصي البرلمان يعيد صياغه بعض قوانين الدستور وفي نفس الوقت قال انه هيحقق في عضويات مجلس الشعب والشورى طب تيجي إزاي دي بقى ، طبعا معروف أوي التزوير الي حصل في الانتخابات ودا هيأدي إلى حل مجلسي الشعب والشورى نظرا إلى عدم شرعيتهم يبقى البرلمان هيغير الدستور امتى !! ولا هي الحكايه – أي كلام في رغيف – وكلام فض مجالس والسلام …
* قالك أنا ماكنتش في يوم من الأيام طالب سلطه هو كان طالب – القرب 🙂 و قال كمان أنا ماكنتش ناوي اترشح – ياعيني يا كبدي أديكوا ظلمتووووووووووووووه يا ظلمه اخص عليكم – بس تصدق معاك حق تقول كده مهو الفشار بيفضل يكدب الكدبه لحد ما يصدقها هو …
* آخر نقطه مهمه جدا في الخطاب وياريت ياريت يكونوا الشباب والمحتجين الي معاهم أخدوا بالهم منها ، قال انه هيطلب التحقيق مع المتسببين فيما شهدته مصر من انفلات امني يعني – ملاحقه الشباب الي بدأوا الحركه دي – طبعا هو صريح جدا وقالها بكل وضوح بس الارسال هو الي كان وحش ، مبارك لم يأبه للـ 300 شهيد دا حتى ماترحمش عليهم وكأنهم لم يكونوا ودا أكبر دليل على إن مبارك هيستغل فترة ال ـ6 شهور الجاية ويستفرد بـ الشباب الي نظموا الاحتجاجات لإن الي عملوه دا كان بمثابه صفعه قويه على قفاه وطبعا قفاه وجعه ، مش لازم ينفصل الشعب ومش لازم تفض الاحتجاجات لإن ده من صنف نيرون حرق روما كلها من أنانيته وده ممكن يحرق مصر كلها كمان من أنانيته وجبروته …
بعد الخطاب أوباما كلم مبارك وبعد كده طلع وأصدر بيان كانت أهم نقطه فيه إن هو طلب من مبارك تغيير فوري وبدء انتقال السلطه سلميا الآن ، دا غير إن مصادر البيت الأبيض قالت إن المبعوث وصل لمبارك رساله مفادها إن – أيامه في الحكم أصبحت معدوده – ربنا يهده بقى دا أيامنا احنا الي بقت معدوده …
بالنسبه بقى للتليفزيون المصري أبو النفاق كله الي ماجبش خبر صح من أول الثوره أقسم بالله العظيم ما جاب ولا خبر من الأخبار المهمه بشكل صحيح وآخر المغالطات كانت مديح أوباما لخطاب الرئيس المصري ودا عكس ماقاله أوباما في تعقيبه على مكالمته مع مبارك ، قال وزعلانين من الجزيره علشان بتوري الناس الصح والي بيحصل ، نفسي أقول لأنس الفقي – يا حلاوه ماما – …
طبعا أي حد شاف المظاهرات الي بتأيد الرئيس وعنده شويه عقل ومنضف عينه هيشوف شويه البلطجيه والحراميه الي جايبينهم يشجعوا والله شوفت واحد واخد مطوه في خده ، والي هيقولي طب ماكان معاهم حسام وإبراهيم وغيرهم ، هقوله إنت حمار وابن حمار لو فكرت أصلا تتكلم في أي واحد من الخسيسين بتوع الكوره الي واكلين البلد والعه ومش هقول غير كده …
أي حد بقى بعد كده سواء فنان أو سياسي أو مواطن عادي يجي يقولي مبارك دا ابن ناس ومبارك دا ماجابتهوش ولاده هقوله انت – تيييييييييييييييييت و ابن تييييييييييييييييييت – انت والخنزير الي بتدافع عنه ، أي واحد هيدافع عن مبارك وهيقولك أنا بحبه تعرف إن – كرشه مليان – يعني واكل البلد والعه يعني معبي كرشه ومتدفي واكل كويس أوي بحق الكلمتين الي بيدافع بيهم مش قايلهم لله وللوطن يبقى يولع هو والي جابوه والي بيشجعه – الله يخرب بيت الي بيأذوا الشباب – …
أخيرا أنا عايزه أقول لكل الشباب الجميل الي كل واحد فيهم واقف وقفه ميه راجل سواء في الاحتجاجات أو في اللجان الشعبيه ربنا يحميكم ويحرسكم وينصركم والله العظيم انتوا خيره الشباب الي مصر طلعتهم و مش محتاجين نستنى بكره علشان نعرف قيمتكم إنتوا عمركم ماكنتم تافهين ولا سطحيين إنتوا عقولكم توزن بلد وأفعالكم أفعال رجال بصحيح تسلم البطن الي شالتكم والأم الي ربتكم تسلم البيوت الي طلعتوا منها والله العظيم ويشهد عليا ربي كنت أتمنى أكون معاكم وسطكم وزيكم ، ماتيأسوش وماتستسلموش إن نصر الله قريب وإن شاء الله زي ما ربنا هد فرعون وهامان وقارون والنمرود والحجاج يهد حسني – قادر يا رب – …
اترك تعليقاً