متخيلة لو بهبهات (ابهات)الجيل الغلبان بتاعنا مقابلوش مامات الجيل الغلبان بتاعنا برضه كان ايه اللي حصل؟؟؟!!
كان اللي هيحصل كالأتي : ( لأ مش أغنية حماده هلال)
أووولا : مكانوش هيتجوزوا وبالتالي مكانوش هيخلفوا حضاراتنا الجيل
الغلبان ( دماغ والله ايه التفكير العاقل و المتعقل ده )
ثالثاااااا : مكنش جيلنا هيبقى موجود وبالتالت ( ما انا قولت بالتالي قبل كده ) مكنش هيبقى غلبان وكحيان وصدمان وعدمان وبتنجان ,مكنش هيبقى فيه زيادة سكانية ولا زحمه ولا دوشة بدليل شوفوا الافلام بتاعت التلاتينات لغاية السبعينات كانت هدووووء ومفيش زحمه والحياة ميت فل وتمنتاشر (شوفتو جيلنا الغلبان عمل ايه في الدنيا لما جالها طبعا مش أي حد)
خامسا : مكناش احنا الشباب هنحس بالشيخوخة واحنا في أحلى مراحل الحياة الفترة اللي بيسموها ربيع العمر بقت صيف العمر حر ودوشة وزحمة أو شتاء العمر كلية وامتحانات وبرررد وانفلونزا
حد هيسألني طب فين ثانيا و رابعا هقولو محبش الارقام الزوجية نعم في اعتراض ولا حاااجه(طبعا في ناس خدت بالها وفي ناس ولا على بالها هههههه )
سابعا : أيوة سابعا صح مش سادسا
ماكنتش كل بنوتة هتمني نفسها بفارس الأوهام اللي جاي سايق عربية كرولا بيضا موديل سنة 2122(حلو الرقم ده ههههه )وفي الأخر يبصبص لغيرها يوم الفرح او في شهر العسل ( عسل اسود على الرجالة اللي بالشكل ده ) وبعدها قدامها حلين تخلع او تتخلع والخلعان مش معناه الطلاق بس دي ممكن تخلع من الدنيا كلها
ياعيني ( طبعا المرأه رقيقة وقارورة بتنكسر بسرعه) ولو خلعت كده من الدنيا وقتها تبقى خسرت الدنيا والأخره !!!!
عاشرا : اه عاشرا حد ليه حاجة عندي …. مكنش كل شاب وشابة بيفهموا جالهم احباط ومش فاهمين ومكبوتين اجتماعيا وسياسيا واقتصاديا فبينطوا على أول مركب متهالكة وطالع عنيها أو بيقعدوا يستنوا الفرج اللي عمره ما هييجي ( ايه الاستكئاب ده )
وزي ما بتقول الاغنية الشهيرة المشهورة بتاعت ثلاثي أضواء المسرح :
(( لو كانوا سألونا قبل ما يولدونا عارفين كنا نقول ايه ,كنا نقول اعتقونا قبل علشان يخلفونا في العهد اللي احنا فيه , يرضيكي يا ماما حوا , يرضيك يا بابا أدم ))
ولكن في الأخر ده قدرنا ومشيئة ربنا سبحانه وتعالى وأكيد احنا مخلوقين في الزمن الدميل ده لحكمه يعلمها رب العالمين
الدنيا مش وحشة اوي كده دايما احيانا بتكون وردي وردي وردي وردي على رأي صفاء أبو السعود بس انتو بصولها بنظرة براءة الأطفال
مافيش سونجاية النهارده غير أغنية لمارسيل خليفة اسمها أمي علشان عيد الام قرب يعني وكده
بس سونجاية جامده مووووووووت
على الهامش :
تنحوا عن زوايا البؤس العالقة بأيامهم .. ونفضوا الدمع عن أجفانهم .. نثروه حولهم كتعوذية شقاء .. تصد البؤس عن اجزائهم المتبقية بسعادة .. وبعد أن حصنوا انفسهم بسمة و إرتياح , غفت أعين السعداء
اترك تعليقاً